Երիտասարդ աղջկան ծեծելու փաստով հետաքննություն է ընթանում

«Հայկական Վերածնունդ» կազմակերպությունը դատապարտում է Սյուզի Գեւորգյանի նկատմամբ քաղաքական հետապնդումը։ «Հունվարի 5-ին, Երեւան քաղաքում դաժանորեն ծեծի է ենթարկվել Նոր Հայաստան Ճակատի ակտիվ աջակից, ռուսաստանաբնակ երիտասարդ Սյուզի Գեւորգյանը՝ նրան պատճառելով ուղեղի ցնցում եւ զգալի մարմնական վնասվածքներ: Հանցագործությունը իրականացրել են երկու տղամարդ, որոնց իսկ հաղորդմամբ ծեծի պատճառը եղել է Սյուզի Գեւորգյանի ընդդիմադիր պայքարից հրաժարվելու նախկինում նրանց հնչեցրած պահանջները չկատարելը: Սա Սյուզի Գեւորգյանի նկատմամբ քաղաքական ենթատեքստով բռնության երկրորդ դեպքն է, իսկ նրա հասցեին սպառնալիքներ հնչել են պարբերաբար: Ինչպես եւ ակնկալվում էր, թե առաջին եւ թե վերջին դեպքում բռնությունն իրականացնողները չեն բացահայտվել եւ չեն պատժվել: Այսպիսով՝ հայաստանյան իրականությունում ավելացավ ռեժիմի կողմից իրականացվող քաղաքական հետապնդումների եւ հաշվեհարդարի եւս մեկ վառ օրինակ: Այս անգամ այն ընդգծված է այն հանգամանքով, որ բռնության զոհը կին է եւ սփյուռքահայ»,- ասվում է հայտարարության մեջ: Կազմակերպությունը նաեւ նշել է, թե «Հայաստանը այլեւս անշեղորեն շարժվում է դեպի բացահայտ բռնապետություն, որտեղ իշխող ուժը ոչ մի միջոցի առջեւ կանգ չի առնում ընդդիմությունը չեզոքացնելու եւ իր աշխանությունը հարատեւելու համար: Այս պայմաններում ռեժիմի դեմ քաղաքական պայքարը վերածվում է ազատագրական պայքարի»: ՀՀ ոստիկանությունն էլ հայտարարություն է տարածել՝ նշելով, որ 24-ամյա աղջկան ծեծի ենթարկելու փաստի առթիվ հետաքննություն է կատարվում։ «Հունվարի 5-ին, ժամը 22.30-ին, հիվանդանոցից ոստիկանության Արաբկիրի բաժնում հաղորդում է ստացվել, որ գլխուղեղի ցնցումով բուժօգնության է դիմել 1992 թ. ծնված Սյուզաննա Գ.-ն եւ հայտնել, որ Կոմիտասի պողոտայում անծանոթ մարդիկ իրեն ծեծի են ենթարկել: Մեկնած օպերատիվ խումբը պարզել է, որ Կոմիտասի պողոտայի թիվ 1 շենքի մոտ երկու անհայտ տղամարդ ծեծի են ենթարկել Սյուզաննա Գ.-ին՝ պատճառելով վնասվածքներ: Տուժողից ընդունվել է հաղորդում: Նշանակվել է դատաբժշկական փորձաքննություն, կատարվում է հետաքննություն»:

Просмотрено 0 раза
Լրահոս
Ամենաընթերցվածները
Շուտով